السلام عليكم قد ايه انا باهتم [ندعوك للتسجيل في المنتدى أو التعريف بنفسك لمعاينة هذا الرابط] وباحب انوع فيها وبجد البوفيه ده كله باعمله في اي عزومه ليا وكل الناس بتنبهر بيه وباحس ان الناس بتسيب الاكل نفسه وبتاكل تقريبا سلطات بس
الطريقه كرنب مبشور او متقطع قطع صغيره +جزر مبشور يضاف لهم الصوص وهو عباره عن مايونيز + زبادي + خل + سكر + رشه ملح خفيفه قوي +شويه لبن صغيرين قوي
تكات نوسه
1- في طريقتين للكول سلو الطريقه الاولي بتبقي طريه شويه زي بتاعه كنتاكي تحسي كان الكرنب مسلوق لا هو مش مسلوق هاقوللك علي السر بتقطعي الكرنب طبعا صغير قوي علي قد ماتقدري وترشي عليه السكر وذره ملح صغيره قوي وتحطيه في مصفه السكر والملح هايخلوا الكرنب ينزل الميه بتاعته هاتستغربي من كميه الميه اللي نازله منه وده بيخليه بعد كده يبقي طري ويشرب كويس من الصوص
الطريقه التانيه انك بتسيبي الكرنب زي ماهو وبيبقي مقرمش ده بقي حسب زوقك انتي
2 - بالنسبه للصوص في ناس بتحط مايونيز بس لكن انا بصراحه مش باحب ااكل معلقه مايونيز كامله كده في بقي فباخفف المايونيز شويه بالزبادي مع شويه لبن حليب او لبن رايب كده بيكون احلي واخف وكمان مش مكلف وخصوصا في العزومات باعمل منها كميات كبيره لانها اول حاجه بتتنسف
3-ممكن استبدال السكر بالعسل النحل بيدي طعم احلي
4- في حاجه اسمها باتر ميلك بتدي طعم احلي واحلي لو متوفره ممكن نضيفها او بدالها الكريمه اللباني او مش لازم خالص بس كل دي حاجات بتدي طعم كريمي رائع
بطاطسايه مقطعه مكعبات ومسلوقه في ماء وملح نضع عليها مايونيز +سكر+ خل + توم مفروم
تكات نوسه
1- السلطه دي طعمها بيبقي زي التوميه باظبط لان فيها توم ومايونيز وبتبقي جميله جدا جدا
2-لازم نقطع البطاطس قبل مانسلقها لان لو سلقناها صحيحه مش هانعرف نقطعها مكعبات وهاتتفرفت مننا
3- لازم البطاطس تكون سخنه يعني نصفيها من ميه السلق ونحط عليها علي طول المايونيز وباقي امكونات علشان البطاطس وهي سخنه بتشرب اي حاجه تتحط عليها لكن لو بردت خلاص بتقفل المسام بتاعتها وده بينطبق علي اي وصفه للبطاطس
4- ممكن نضيف بقدونس مفروم ونقلبه معاها وده حسب الزوق
كلنا عارفينها بس في حاجات بتخليها احلي نخش عالتكات علي طول
تكات نوسه
1- يفضل ان البصل يتنقع في خل وملح شويه قبل ماتعملي السلطه لانه كده بيدبل شويه ومش بيحرق العين وانتي بتاكلي
2- الخيار لو قشرتيه هايفرق قوي في الطمع انا زيك كده كنت مستهتره بالموضوع ده وعمري مافكرت اعمله وكنت باقول ايه الشيفات الهبله دي بيقشروا الخيار ليه بس لما جربت عرفت الفرق ... انتي كمان لازم تعرفيه
3- الخس الكابوتشا افضل بكتير من الخس البلدي ولكن يفضل تقطيعه عشوائيا باليد مش بالسكين لانه رقيق قوي وبينزل ميه علي طول
4- الصوص او الدريسنج مهم جدا مش شويه خل وكمون واقلب لا اعملي اي صوص كويس تحبيه انا عامه باحب صوص المسترده معلقه مسترده معلقتين زيت دره خل ملح سكر واضربيهم في الكبه هايبقي تقيل زي المايونيز بس تحححححححححححححححححححفه
1- السلطات كلها لازم تكون معموله قبلها بيوم او علي الاقل من الصبح علشان تتشرب التتبيله كويس
2- الزبادي المستخدم في اي نوع سلطه لازم يبقي زبادي مبستر زي جهينه او اي ماركه تحبيها عشان طعمه بيبقي كريمي لكن الزبادي البلدي بيعمل حتت صغيره كده ومش بيدوب كويس
3-- المقادير بصراحه مش باعرفها لاني باعمل بالبركه كمان دي بتبقي متروكه لزوقك الشخصي انتي مع الوقت هاتظبطي ومهم قوي انك تدوقي بين كل خطوه والتانيه لحد ماتعرفي تظبطيها
4-اي حاجه مسلوقه زي البطاطس او البنجر او المكرونه او الحمص لازم تتعمل علي طول وهي سخنه علشان تتشرب الطعم لكن لو سبتيها تبرد وبعدين حطيتي باقي المكونات مش هاتتشرب
